Gwamnatin Jihar Kano ta ba da umarni ga Hukumar Hisba ta fara shirye-shiryen gudanar da auren ma’aurata 2,000 karkashin shirin auren gata. Mataimakin Kwamanda Janar na hukumar, Sheikh Mujahid Aminudeen, ya bayyana cewa shirin yana karkashin jagorancin Gwamna Abba Kabir Yusuf, kuma an kaddamar da shirye-shirye domin tabbatar da nasarar bikin aure. Duk masu son shiga dole ne su yi rajista tare da cikakken binciken lafiya, wanda ya haɗa da gwajin cututtuka da miyagun ƙwayoyi.
Hukumar Hisba ta ce an dawo da shirin ne domin tallafa wa marasa galihu, zawarawa, marasa aure da iyalai masu ƙaramin ƙarfi. Manufar ita ce rage yawaitar karuwanci da wasu matsalolin zamantakewa da suka shafi ‘yan mata da zawarawa a jihar. Shirin zai ba da damar yin aure cikin sauƙi ga waɗanda ke fuskantar ƙalubalen tattalin arziki.
Shirin auren gatan ya kasance ɗaya daga cikin muhimman tsare-tsaren jinƙai na Kano a baya. Sake farfado da shi yana nuna niyyar gwamnati wajen inganta rayuwar al’umma ta hanyar ƙarfafa zumunci, rage matsalolin tattalin arziki da samar da ingantaccen tsarin zamantakewa ga ma’aurata masu tasowa.
