Hukumar Zaɓe ta Ƙasa mai zaman kanta ta Najeriya, INEC, ta ce ta fara tattaunawa da masu ruwa da tsaki domin nemo mafita ga ƙorafe-ƙorafen da suka taso kan jadawalin zaɓen 2027, musamman dangane da lokacin da ya zo daidai da watan azumin Ramadan. Hukumar ta bayyana cewa tana sauraron ra’ayoyin al’umma domin tabbatar da cewa babu wani ɓangare da aka cutar.
INEC ta kuma bai wa ƴan Najeriya tabbacin cewa za ta yi la’akari da buƙatun addini, al’adu da walwalar jama’a yayin tsara ayyukanta, domin tabbatar da sahihanci da karɓuwar tsarin zaɓe. Hukumar ta ce manufarta ita ce gudanar da zaɓe cikin lumana tare da samun cikakken haɗin kan jama’a.
Tun da farko, INEC ta sanar da cewa za ta gudanar da zaɓen shugaban ƙasa da na ƴan majalisar dokokin tarayya a ranar 20 ga Fabrairu, 2027, yayin da zaɓen gwamnoni da na majalisun dokokin jihohi zai gudana a ranar 6 ga Maris, 2027. Wannan jadawali ne da ya ja hankalin jama’a tun bayan fitar da shi.
Sai dai jadawalin ya haddasa cece-kuce musamman a tsakanin wasu Musulmai, waɗanda suka nuna damuwa cewa gudanar da zaɓe a lokacin azumi na iya shafar halartar jama’a da kuma sauƙin gudanar da ayyukan zaɓe. Hakan ne ya sa INEC ke ƙoƙarin yin shawarwari domin duba yiwuwar daidaita jadawalin ko samar da mafita mai gamsarwa ga kowa.
