A kalla manoma takwas aka sace a wani sabon harin ’yan bindiga da ya afka kauyukan Wasagu a jihar Kebbi ranar Asabar, inda wani mutum guda kuma aka harbe shi a gonarsa. Shugaban ƙaramar hukumar Danko Wasagu, Hussaini Aliyu Bena, ya tabbatar da hakan, yana mai cewa maharan sun farmaki manoman ne da rana yayin da suke bakin aiki.
Bena ya ce an garzaya da wanda aka harba zuwa Asibitin Gwamnati na Wasagu, yayin da jami’an tsaro suka fara bin sahun maharan domin kubutar da waɗanda aka yi garkuwa da su. Shaidu a yankin sun ce maharan — waɗanda ake zargin sun shigo daga Zamfara — sun yi ta aiki na tsawon mintuna kafin su tsere da mutanen.
A cewar wasu mazauna yankin, lamarin ya tsananta, musamman ganin cewa wannan shi ne karo na biyu cikin kasa da makonni biyu. Sun ce fiye da mutum 40 aka sace a farkon wannan watan, lamarin da ya kara fargabar tabarbarewar tsaro a yankin.
Masu amfani da kafafen sada zumunta, ciki har da masani kan tsaro Bakatsine, sun gargadi hukumomi da cewa yankin Wasagu na fuskantar barazana mai kamari. Yanzu haka mazauna suna kira ga Gwamnatin Jihar Kebbi da ta Tarayya da su ƙara tura jami’an tsaro tare da ɗaukar matakai masu ƙarfi domin dakile hare-haren da suka ki ci suka ki cinyewa.
