Gwamnatin jihar Kano ta ƙaddamar da rundunar tsaro da kare unguwanni ta mutum 2,000 a filin wasa na Sani Abacha, a wani mataki da ake sa ran zai taimaka wajen ƙarfafa tsaro da rage aikata laifuka a faɗin jihar. An kafa rundunar ne domin taimakawa hukumomin tsaro na ƙasa wajen sa ido da kare rayuka da dukiyoyin al’umma, musamman a matakin unguwanni.
Rahotanni sun nuna cewa rundunar ta ƙunshi matasa da aka horas kan ayyukan tsaro, tattara bayanan sirri da kuma aiki tare da ’yan sanda da sauran hukumomin tsaro. Gwamnatin jihar ta bayyana cewa za a rarraba su a ƙananan hukumomi daban-daban domin tabbatar da tsaro a kasuwanni, makarantu, unguwanni da sauran muhimman wurare.
Gwamnatin Kano ta jaddada cewa ƙaddamar da rundunar na daga cikin ƙoƙarin da take yi na samar da zaman lafiya mai ɗorewa da kuma bai wa al’umma kwarin gwiwar rayuwa cikin aminci. Ta kuma yi kira ga mazauna jihar da su ba da haɗin kai da goyon baya ga rundunar, domin ta samu nasara a aikinta na kare lafiyar jama’a da dukiyoyinsu.
