Fitaccen jigo a jam’iyyar NNPP, Buba Galadima, ya caccaki matakin rufe makarantu a wasu sassan Arewacin Najeriya sakamakon tabarbarewar tsaro, yana kiran hukuncin a matsayin abin kunya da gazawar shugabanni wajen kare rayuka da dukiyoyin al’umma. Ya bayyana hakan ne a shirin Prime Time na ARISE News, inda ya danganta yawaitar sace-sacen dalibai a Jihar Neja da sauran yankuna da gazawar gwamnati wajen daukar tsaro da muhimmanci.
Galadima ya jaddada cewa rufe makarantu ba mafita ba ce, yana mai cewa abin da ya dace shi ne karfafa tsaro da kare wuraren ilimi daga miyagu, ba mika su hannun ’yan bindiga ba. Ya zargi shugabanni da daukar mulki da wasa tare da ware fiye da 90 cikin 100 na lokacinsu ga siyasa maimakon yaki da rashin tsaro. Ya kuma soki dabarar gwamnati ta amfani da karfi ba tare da ingantaccen leken asiri ba, yana shawartar amfani da fasaha, basira da dabarun zamani wajen gano barazana kafin ta afku.
Galadima ya yi ikirarin cewa jami’an tsaro sun samu bayanan sirri kafin harin da aka kai a Neja amma suka kasa daukar mataki cikin gaggawa. Ya yi tir da zargin cewa sojojin da aka tura wurin makarantar sun bar aikinsu, yana mai cewa ya dace a hukunta su bisa ka’ida. Ya kuma kwatanta tsarin tsaron Najeriya da na kasashen da ke amfani da CCTV da fasahohin sa ido wajen gano bata-garin cikin kankanin lokaci.
A halin da ake ciki, rahotanni sun tabbatar da cewa aƙalla jihohi biyar a Arewacin Najeriya sun rufe makarantu saboda karuwar hare-haren sace mutane, yayin da wasu kuma suka umarci daliban kwana su koma gidajensu. Galadima ya nanata cewa Najeriya ta kai wani mataki da ya wuce dogaro da karfin sojoji kawai, yana kira ga gwamnatin tarayya ta sabunta dabarunta cikin gaggawa domin kare ’yan kasa da tabbatar da cigaban ilimi ba tare da katsewa ba.
