Hukumar Kiyaye Afkuwar Haɗura Ta Ƙasa (FRSC) reshen Abuja ta bayyana cewa ta kama direbobi fiye da 27,000 saboda karya dokokin zirga-zirga tsakanin watan Yuli zuwa Satumba na wannan shekara ta 2025. Kwamandan hukumar a FCT, Felix Theman, ya bayyana haka yayin taron wayar da kai na watannin ƙarshen shekara (Ember Months), inda ya ce yawanci an kama direbobin ne kan laifukan tuƙi cikin sakaci da rashin bin dokokin tsaro a kan hanya.
A cewar Theman, hukumar ta gudanar da bincike kan hatsurukan da suka faru a cikin birnin, inda aka gano cewa yawancin su na faruwa ne sakamakon irin halayen direbobi kamar tuki tare da kiran waya, da kuma ɗaukar fasinjoji fiye da kima. Ya ce hukumar ta ƙara tsaurara matakan sa ido domin dakile irin wannan sakacin da ke jawo asarar rayuka da dukiyoyi.
Kwamandan ya ce ko da yake an ƙara kama masu laifi, hukumar na ci gaba da wayar da kai tare da haɗa kai da ƙungiyoyin direbobi da sauran masu ruwa da tsaki don inganta tsaron hanya. Ya jaddada cewa dukkanin masu amfani da hanya—direbobi da fasinjoji—na da rawar da za su taka wajen tabbatar da tsaro.
A wani mataki daban, FRSC FCT ta kuma kama direbobi sama da 250 cikin kwanaki biyu na wani sabon samame, saboda kin bin umarnin cewa motar haya ba za ta ɗauki fasinjoji fiye da guda ɗaya a kujerar gaba ba. Hukumar ta ce wannan mataki na daga cikin dabarun dakile cunkoso da tabbatar da bin ƙa’idojin tsaro a cikin motocin haya.
