Ɗan takarar gwamnan Jihar Kano na jam’iyyar African Democratic Congress (ADC), Ibrahim Al-Amin Little, ya zaɓi ƙwararren masani a fannin ICT, Abdulkadir Shehu Bari, mai shekaru 36, a matsayin abokin takararsa a zaɓen 2027.
Al-Amin ya bayyana Bari a ranar Lahadi a Kano, yayin da yake gabatar da ajandar yakin neman zaɓen jam’iyyar. Ya ce gwamnatin ADC za ta mayar da hankali kan bunƙasa tattalin arziki, samar da ayyukan yi, farfaɗo da masana’antu da inganta walwalar al’umma.
Ɗan takarar ya kuma yi alkawarin samar da damarmaki ga matasa domin rage yawan barin ƙasar zuwa Turai, tare da kafa tashar samar da wutar lantarki mai zaman kanta domin farfaɗo da masana’antu da jawo zuba jari. Ya kuma ce zai soke dokokin da ke bai wa tsoffin gwamnoni, mataimakan gwamnoni da kakakin majalisar dokokin jihar wasu alawus-alawus na rayuwa.
Abdulkadir Shehu Bari, wanda aka haife shi a shekarar 1990, masanin Computer Science ne kuma malami daga Bari Town a Ƙaramar Hukumar Rogo. Ya yi aiki a Kwalejin Aikin Gona ta Audu Bako da ke Dambatta, inda ya riƙe mukamai daban-daban, sannan ya shiga ayyukan ƙarfafa matasa, ilimin ƙasa da sana’o’i.
