Nigerian Supreme Council for Islamic Affairs ta buƙaci al’ummar musulmi a faɗin Najeriya da su fara duban jinjirin watan Ramadan bayan faɗuwar rana ranar Talata, 17 ga Fabrairu, 2026, wanda ya yi daidai da 29 ga Sha’aban 1447 Hijira.
Sanarwar ta fito ne daga Sa’ad Abubakar, Sarkin Musulmi kuma shugaban majalisar, ta bakin sakataren majalisar, Farfesa Ishaq Oloyede. Majalisar ta ce idan an ga jinjirin a wannan rana, to Laraba 18 ga Fabrairu, 2026, ita ce ranar farko ta azumin Ramadan. Amma idan ba a gani ba, to Alhamis 19 ga Fabrairu, 2026, za ta zama ranar farko ta azumi.
Majalisar ta kuma bayyana cewa kwamitin duba wata na ƙasa tare da haɗin gwiwar hukumomin binciken sararin samaniya sun tanadi dukkan matakan da suka dace domin tabbatar da sahihin rahoton ganin jinjirin watan.
Haka kuma, majalisar ta buƙaci musulmi su ci gaba da kasancewa masu haƙuri, kwanciyar hankali da kuma riƙon kyawawan ɗabi’u yayin watan Ramadan, tare da yin addu’ar samun zaman lafiya da kariya ga ƙasar Najeriya.
