Shugaban ƙasa Bola Ahmed Tinubu ya soke afuwar da aka bai wa Maryam Sanda, wadda kotu ta yanke wa hukuncin kisa a 2020 bisa zargin kashe mijinta, Bilyaminu Bello. Wannan mataki ya zo ne bayan suka daga jama’a da ƙungiyoyin kare haƙƙin ɗan Adam, waɗanda suka kalubalanci amincewar da gwamnatin tarayya ta yi da sakin ta.
A cewar sanarwar da mai ba shugaban ƙasa shawara kan bayanai, Bayo Onanuga, ya fitar, an sabunta hukuncin Maryam Sanda a cikin wata takardar gazette ta hukuma, inda aka bayyana cewa za ta ci gaba da zaman gidan yari na shekaru 12 maimakon a sake ta. An ce ta riga ta shafe shekaru shida da wata takwas a gidan gyaran hali na Suleja, kuma sabon hukuncin zai bai wa ta damar kammala sauran lokacin da ya rage.
Matakin ya tayar da cece-kuce a ƙasar, inda wasu ke yaba wa shugaban ƙasa bisa gyara abin da suka kira “kuskuren afuwa,” yayin da wasu ke ganin hakan na nuna rashin daidaito a yadda gwamnati ke gudanar da lamurran afuwa da shari’a.
