Najeriya ta kashe kimanin Naira tiriliyan 1.7 kan fetur (PMS) a watan Disambar 2025, bayan da yawan amfani ya ƙaru zuwa lita miliyan 63.7 a rana. Bayanai daga Hukumar Kula da Harkokin Man Fetur (NMDPRA) sun nuna cewa hauhawar ta samo asali ne daga ƙaruwar samarwa daga matatar Dangote da kuma ci gaba da shigo da fetur daga ƙasashen waje.
Rahoton ya nuna cewa farashin litar fetur a watan Disamba ya kasance tsakanin N837 zuwa N920, inda matsakaici ya kai N878.50 a lita, lamarin da ke nuni da kashe kusan N55.9bn a rana. Duk da cewa matatar Dangote ta samar da sama da lita miliyan 32 a rana, har yanzu ana shigo da kusan lita miliyan 42.2 a rana, wanda ke nufin shigo da kaya na ɗaukar fiye da rabin buƙatar fetur a ƙasar.
Shugaban Rukunin Dangote, Aliko Dangote, ya danganta ƙarin samarwar fetur da sauye-sauyen tsari da Shugaba Bola Tinubu ya yi, musamman cire jami’an da ya kira masu cin hanci a ɓangaren man fetur. Sai dai rahoton ya nuna cewa matatun mai na gwamnati a Port Harcourt, Warri da Kaduna sun ci gaba da zama rufe, yayin da gudummawar ƙananan matatun mai batada yawa.
