Dakarun rundunar ɗguiwa ta arewa maso gabas, Operation HADIN KAI, sun kama wata mata ’yar shekara 65 da haihuwa bisa zarginta da safarar miyagun ƙwayoyi ga ’yan ƙungiyar Boko Haram a jihar Borno. An kama wadda ake zargin ne a ƙaramar hukumar Askira Uba a ranar 23 ga watan Janairu, 2026.
Sanarwar da jami’in yaɗa labarai na rundunar, Laftanar Kanar Sani Uba, ya fitar ta ce an cafke matar ne yayin wani samame da aka kai bisa bayanan sirri. Rundunar ta ce ana zargin ta da zama babbar mai samar da tabar wiwi ga ’yan Boko Haram a yankunan Askira Uba, Rumirgo, Gwahi, Wamdiyo, Uvu da Gaya.
Binciken farko ya nuna cewa matar na samo tabar wiwin ne daga ƙaramar hukumar Sarti Baruwa ta jihar Taraba, inda aka kama ta da ƙunshin ganyen wiwi guda 14 masu nauyin kimanin kilo 30. Rundunar ta ce a halin yanzu wadda ake zargin na tsare, yayin da ake ci gaba da bincike domin gano da kuma wargaza hanyoyin safara da rarraba miyagun ƙwayoyi.
