Rahma Media Group ta naɗa Zahraddeen Munnir Jaoji a matsayin Shugaban Tashar Rahma Radio 104.1 FM, Abuja. An sanar da naɗin ne a wata wasiƙa mai kwanan wata 28 ga Agusta 2026, inda aka bayyana cewa zai fara aiki daga 1 ga Satumba.
Kafin wannan naɗi, Zahraddeen ya kasance Shugaban Sashen Gabatar da Shirye-shirye na Rahma Radio Kano. Ya shafe kusan shekaru 15 yana aiki a kafar, inda ya samu ƙwarewa a fannonin gudanarwa da shirye-shiryen rediyo.
A matsayinsa na sabon Shugaban Tashar Abuja, Zahraddeen zai jagoranci harkokin gudanarwa da ayyukan tashar na yau da kullum, tare da kula da ma’aikata da tabbatar da bin manufofi da ƙa’idojin Rahma Media Group.
Sabon muƙamin zai kuma ba shi alhakin daidaita ayyukan tashar da sa ido kan shirye-shirye, domin tabbatar da ingantaccen aiki. Rahma Media Group ta bayyana fatanta cewa zai yi amfani da ƙwarewarsa wajen bayar da gudunmawa ga ci gaban Rahma Radio 104.1 FM, Abuja.
