Kwamitin Majalisar Wakilai da ke binciken ayyukan hukumar Presidential Foreign Investment Promotion Council (PFIPC) ya umarci Sufeto Janar na ‘Yan Sanda, Olatunji Disu, da ya gabatar da Adeyemi Adeniyi, wanda ke ikirarin shi ne Darakta Janar na hukumar, a gabansa cikin sa’o’i 48.
Umarnin ya biyo bayan zaman bincike da kwamitin ya gudanar a Abuja, inda ‘yan sanda suka tabbatar da cewa suna gudanar da bincike kan zargin Adeyemi da gabatar da kansa a matsayin Darakta Janar na PFIPC da kuma Presidential Economic Advisory Council ba bisa ka’ida ba.
Kwamitin ya ce ana binciken yadda aka ware wa hukumar da ba a kafa bisa doka ba naira biliyan 1.32 a kasafin kuɗin shekarar 2026, tare da zargin amfani da takardun bogi daga hukumomin gwamnati domin neman amincewa da ayyukan hukumar.
‘Yan sanda sun bayyana cewa an riga an gurfanar da Adeyemi a gaban Babbar Kotun Tarayya kan tuhume-tuhume takwas da suka shafi zamba da haɗa baki. Haka kuma kwamitin ya ce bincikensa zai ci gaba domin gano gaskiyar lamarin da kuma ɗaukar matakan da suka dace.
